बाँसुरी खबर 
बुढीचौर ।
प्रतिनिधि सभा सदस्य युवराज दुलालले सबै पक्षबीच समन्वय र सहकार्यले मात्रै बिकास संभव हुने बताएका छन्।
सिन्धुपाल्चोकको इन्द्रावती गाउँपालिकास्थित बुढीचौरमा आयोजित दोस्रो ऐतिहासिक इन्द्रावती बुढीचौर नयाँ वर्ष सांस्कृतिक मेला २०८३ लाई सम्बोधन गर्दै सांसद दुलालले विरोधले गरेर विकास नहुने भएकोले सबै मिलेर अघि बढ्नुपर्ने धारणा व्यक्त गरेका हुन्।
सांसद दुलालले आफू पुरै क्षेत्रको प्रतिनिधि भएकाले सबै स्थानलाई समान रूपमा विकास गर्दै लैजानुपर्ने आवश्यकता रहेको बताए । आफू प्रदेश सरकारमा हुँदा पनि इन्द्रावती गाउँपालिकामा सबैभन्दा बढी बजेट ल्याउने पालिकामध्ये एक भएको उल्लेख गर्दै शिक्षा, खेलकुद, सडक लगायतका क्षेत्रमा सुरु भएका योजनाहरू पूरा गर्न आफू प्रतिबद्ध रहेको उनले बताए।
सांसद दुलालले बुढीचौर क्षेत्रमा संरचना निर्माणका लागि आफू सुरु देखि नै सक्रिय रूपमा लागेको जनाउँदै यसको परिकल्पना अनुसार विकास अघि बढाउन सबैको साथ, सहयोग र प्रयास आवश्यक रहेको बताए। “मैले र उसले गर्ने काम भनेर नलिई डीपीआर अनुसार संरचना निर्माण गर्न सबैको पहल जरुरी छ,” उनले भने।
कार्यक्रममा स्थानीय कला, संस्कृति तथा सांगीतिक प्रस्तुति समेत राखिएको थियो। मेलाले स्थानीय पर्यटन प्रवर्द्धन, सांस्कृतिक संरक्षण तथा सामाजिक एकतामा सकारात्मक योगदान पुर्याएको आयोजकले जनाएको छ।
प्रतिक्रिया दिनुहोस्