बाँसुरी खबर 
नवलपुर । इन्द्रावती गाउँपालिकाले आधारभूत तह (कक्षा ८) अन्तिम परीक्षाको नतिजा सार्वजनिक गरेको छ। गाउँपालिका शिक्षा तथा खेलकुद शाखाले सार्वजनिक गरेको विवरणअनुसार यस वर्ष समग्रमा ५७ दशमलव १९ प्रतिशत विद्यार्थी उत्तीर्ण भएका छन्।
कुल ३ सय २७ जना विद्यार्थी परीक्षामा सहभागी भएकामध्ये १ सय ८७ जना उत्तीर्ण भएका छन् भने बाँकी विद्यार्थी अनुत्तीर्ण भएका छन्। नतिजाले गाउँपालिकाभित्रको शैक्षिक अवस्थाको मिश्रित चित्र प्रस्तुत गरेको छ।
नतिजाअनुसार जनसुधार आधारभूत विद्यालय र कमलादेवी माध्यमिक विद्यालयले शतप्रतिशत नतिजा ल्याउँदै उत्कृष्ट प्रदर्शन गरेका छन्। ती विद्यालयले उच्च जिपिएसहित सबै विद्यार्थी उत्तीर्ण गराउन सफल भएका हुन्।
त्यसैगरी, ऐसेलुखर्क माध्यमिक विद्यालय, जलेश्वर आधारभूत विद्यालय, परोपकार आधारभूत विद्यालय, सेतीदेवी माध्यमिक विद्यालय लगायतका विद्यालयहरूले पनि उल्लेखनीय नतिजा हासिल गरेका छन्।
यता केही विद्यालयहरूको उत्तीर्णदर भने कमजोर देखिएको छ। विशेषगरी महेन्द्र माध्यमिक विद्यालय, सरस्वती आधारभूत विद्यालय लगायतका विद्यालयमा न्यून उत्तीर्णदर देखिएकाले शिक्षण सिकाइ प्रक्रियामा थप सुधार आवश्यक देखिएको गाउँपालिकाले जनाएको छ।
गाउँपालिकाले आगामी दिनमा कमजोर नतिजा भएका विद्यालयहरूमा विशेष शैक्षिक सुधार कार्यक्रम सञ्चालन गर्ने, शिक्षक क्षमता विकासमा जोड दिने तथा विद्यार्थी केन्द्रित सिकाइ प्रणालीलाई अझ प्रभावकारी बनाउने योजना बनाएको छ।
स्थानीय स्तरमै परीक्षा सञ्चालन र मूल्याङ्कन गरिँदै आएकोमा यस वर्षको नतिजाले शैक्षिक सुधारतर्फ केही सकारात्मक संकेत देखिए पनि समग्र गुणस्तर वृद्धि गर्न अझै प्रयास आवश्यक रहेको सरोकारवालाहरूले बताएका छन्।
प्रतिक्रिया दिनुहोस्