बाँसुरी खबर 
काठमाडौं । नेपालमै पहिलो पटक सिटिजन्स बैंकले मोबाइल बैंकिङ एपमार्फतनै डिम्याट तथा सी–आस्बाको सुविधा प्रदान गर्नेगरी माई–आस्बा सुविधा ल्याएको छ । बैंकले ग्राहकहरुलाई धितोपत्र कारोबारका लागि थप सहज होस् भन्ने उद्देश्यका साथ आफ्नो मोबाइल बैंकिङ एपमा नै डिम्याट, सी–आस्बा, सिआरएनको सुविधा प्रदान गरेको हो ।
प्रयोगकर्ताहरुले सिटिजन्स बैंकको मोबाइल बैंकिङ सुविधामा डिम्याटको सुविधा पाउनेछन् भने सोही डिम्याटका आधारमा सी–आस्बा नम्बर र सीआरएन नम्बर समेत पाउनेछन् । यसका लागि ग्राहक बैंकको काउन्टरसम्म धाइराख्नु पदैन । बैंकको मोबाइल एपलिकेशनमार्फत नै प्रयोगकर्ताले कम्पनीको आईपीओ तथा एफपीओ भर्न (आवेदन दिन) सक्ने बैंकको डिम्याट तथा सी–आस्बा विभाग प्रमुख रोजिना तिवारीले कर्पोरेट नेपालसँग बताइन् ।
उनले भनिन्, ‘जो कोही ग्राहकको पहिले नै डिम्याट एकाउन्ट भएको वा नभएकोमा पनि बैंकको मोबाइल बैंकिङ एपबाटै डिम्याट एकाउन्टको सुविधा पाउनेछन् । बैंकको माई–आस्बा सुविधामार्फत आईपीओ तथा एफपीओ आवेदनका लागि अनिवार्य रहेको सिआरएन नम्बर र सी–आस्बा नम्बर सजिलै प्राप्त गर्न सक्नेछन् ।’ यस्तो सिआरएन र सी–आस्बा नम्बर पहिलेनै डिम्याट खाता भएको ग्राहकले मोबाइल एपमार्फत रजिष्ट्रर गर्न मिल्ने र तुरुन्त सिर्जना हुने उनले बताइन् । थप ग्राहकले आईपीओ, एफपीओमा आवेदन दिन छुट्टै डिम्याट खातामा नभएर मोबाइल बैंकिङ एपमार्फत नै आवेदन दिन सक्ने र आवेदनको भेरिफाइ पनि रियल टाईम उपलब्ध हुने उनले बताइन् ।
यति मात्र होइन कम्पनीको शेयर बाँडफाँडको रिजल्ट, आवेदकलाई पर्यो कि परेन? सो समेतको जानकारी मोबाइल एप्लिकेशनमा नै उपलब्ध हुने उनले बताइन् । तर, यसका लागि एपले अलटमेन्ट दिने नभएर प्रयोगकर्ताले एपमानै गएर हेर्नुपर्ने उनले बताइन् । नेपालमा नै पहिलो पटक सार्वजनिक गरिएको भनिएको यो सुविधा बैंकले गत मंसिर अन्तिम साताबाट मात्र शुरुवात गरेकोक हो । यो सुविधा छोटो समयमा नै निकै लोकप्रिय हुन सफल भएको बैंकले जनाएको छ ।
प्रतिक्रिया दिनुहोस्