बाँसुरी खबर 
सिन्धुपाल्चोक । सिन्धुपाल्चोकको चौतारा साँगाचोकगढी नगरपालिका–६ पिपलडाँडाका स्थानीय सडक स्तरोन्नतिमा ढिलाइ भएको भन्दै आन्दोलित भएका छन्। समय सकिन चार महिना मात्रै बाँकी रहँदा कामको प्रगति करिब २५ प्रतिशत मात्र पुगेको भन्दै स्थानीयले शुक्रबार नारा जुलुससहित पूर्वाधार विकास कार्यालय पुगेका हुन्।
स्थानीयका अनुसार चौतारा–नवलपुर–मेलम्ची सडक खण्डअन्तर्गत चौतारा–झ्याँडी भागको काम अत्यन्त सुस्त गतिमा भइरहेको छ। स्थानीय सुनिल बुढाथोकीले सडक निर्माण ढिलाइ हुँदा हिँडडुल गर्न कठिन भएको र धुलोका कारण स्वास्थ्यमा समेत असर परेको बताए। कृष्णबहादुर कुँवरका अनुसार ठेकेदार कम्पनीले समयमा काम नगर्दा स्थानीयले सास्ती भोग्नुपरेको भन्दै समयसीमाभित्र काम सम्पन्न गराउन आन्दोलन गर्नुपरेको हो।
सिद्धबाबा कन्स्ट्रक्सनले २०८० असार २२ गते चौतारादेखि झ्याँडीसम्म ८.२ किलोमिटर सडक स्तरोन्नति तथा कालोपत्रे गर्ने ठेक्का लिएको थियो। २६ करोड ८२ लाख ९३ हजार २६० रुपैयाँ लागतमा दुई वर्षभित्र काम सक्ने सम्झौता भए पनि अहिलेसम्म अपेक्षित प्रगति नभएको पूर्वाधार विकास कार्यालयले जनाएको छ।
पूर्वाधार विकास कार्यालयका सिनियर डिभिजनल इन्जिनियर प्रकाश पौडेलले भने ठेकेदार कम्पनीलाई समयमै काम सम्पन्न गर्न निरन्तर ताकेता गरिरहेको बताए। स्थानीयले ‘हाम्रो माग पूरा गर’, ‘ठेकेदार कम्पनी खारेज गर’ जस्ता नारासहित प्रदर्शन गरेका थिए।
प्रतिक्रिया दिनुहोस्